ULPC: Un novo concepto

ULPC (ultra low-cost PC), minilaptop, subnotebook, ultraportátil, microportátil son algúns dos nomes cos que nos referimos a un novo tipo de ordenadores. Se todavía non existe unha denominación universalmente aceptada é porque este produto é de moi recente creación. Referímonos a equipos que teñen como características fundamentais un moi baixo precio e un moi pequeno tamaño. De forma máis detallada, falamos de portátiles coas seguintes características e prestacións:

• Pantalla en torno a 8'' (en calquer caso, menos de 12'')
• Peso arredor de 1 kg
• Conectividade WiFi
• Ausencia de disco duro con partes móbiles (normalmente presentan memoria flash, que consume menos enerxía e por tanto fai que a batería dure máis e resulta máis silenciosa pois non precisa ventilador)
• Sistema operativo Linux de serie aínda que normalmente soportan Windows (algúns destes equipos ofrecen a opción de compra con Windows pero isto aumenta o precio)
• RAM de 512 MB como mínimo (xa hai equipos con 2 GB)
• Webcam
• Portos USB
• Batería de non menos de 3h de duración
• Precio en torno a 200-300 € (na súa versión máis básica)

A idea orixinal foi da organización OLPC (one laptop per child) que pretendía achegar as novas tecnoloxías a todos os nenos do mundo e especialmente a aqueles que vivían en países en vías de desenvolvento. Presentaron así o XO, un portátil que inicialmente se comercializou por 100 $ e que funcionaba incluso en lugares onde non existía subministro eléctrico.

Nenos e non tan nenos de todo o mundo puxeron os ollos neste equipo que por primeira vez unía as prestacións e precio dun portátil normal ao tamaño dun notebook. Evidentemente, un equipo con pantalla de 7'' non resulta cómodo para un traballo diario de varias horas de duración e iso sen falar dun teclado de reducidas dimensións no que cada dedo dun adulto "ocupa" máis dunha tecla :-) Con todo, resulta unha opción moi apetecible para aqueles que teñen que desprazarse cada día cargando cun equipo de máis de 2 kg de peso.

A empresa informática Asus, consciente do potencial destes portátiles como segundo equipo para usuarios que xa dispoñen dun ordenador de maiores prestacións, lanzou ao mercado o Eee PC, que neste pasado Nadal foi o regalo estrela en Estados Unidos e un dos obxectos máis buscados en lugares como Ebay.

Á vista do éxito do Eee PC, outras firmas como HP ou a española Airis ultiman os detalles do lanzamento dos seus microportátiles dos que atoparedes información na seguinte ligazón.

Actualización: no blog tecnoloxía da ESO podedes atopar máis información acerca dos ultraportátiles e tamén varias ligazóns interesantes.

Reutilizando o papel: fundas para CD/DVD

Para que serve un A4 que está escrito polas dúas caras? Unha forma de reutilizar este papel é a que nos propoñen a través do blog ecomicrosiervos. Aquí tedes instrucións precisas para transformar ese anaco de papel nunha útil funda que evitará que os vosos DVDs se estropeen. Pensade que non só estades reutilizando papel, tamén evitades o uso de plásticos.

Problema complexo. Solución simple

Como facer que varias persoas teñan acceso a través dunha cerca utilizando cada unha delas unha chave distinta?

Esta é a cuestión que nos prantexan en microsiervos e que a pesar do que poda parecer, ten unha solución simple:

Empregaremos varios cadeados, cada un cunha chave diferente, dispoñéndoos tal e como se indica na imaxe.

Actividades: Pneumática

Deixo na zona de descargas de 4º de ESO unha pequena actividade de identificación de compoñentes dun circuíto pneumático.

A mocidade coa nosa lingua

Gracias aos sempre ben informados responsables de Radio Furoca souben que o grupo Relúa, formado por alunos do noso instituto resultou gañador na IX edición do certame "A mocidade coa nosa lingua". Noraboa!!!!!!!!!!!!!!!

Podedes botar un ollo tamén á reportaxe de laopinioncoruña.es

De cando non existía a asignatura de Tecnoloxía

A introdución da asignatura de Tecnoloxía no sistema educativo español é moi recente pero para os que sempre tivemos certas inquietudes, existían cando eu era pequena libros estupendos como os da serie Cómo hacer (todavía teño algún por casa :-)

Dende a páxina para que no se olviden púxose en marcha un proxecto para preservar moitos daqueles libros que con toda seguridade xa hai anos que están descatalogados. Podedes botarlles un ollo...

Consellos ecolóxicos

O uso racional da tecnoloxía é un asunto moi importante no que todos temos moito que aprender. En ecomicrosiervos atoparedes case diariamente consellos para optimizar os recursos e poñer o noso gran de area no aforro de enerxía.

Fondos de escritorio

A través de eCuaderno chéganos unha colección de máis de 200 fondos de escritorio para descargar.

Contrasinais seguros

Un contrasinal (password) é unha cadea de caracteres, non necesariamente letras, que permite o acceso dun usuario a un determinado servicio. Un blog, unha conta de correo ou o inicio de sesión no voso ordenador, requiren da introducción dun contrasinal.

Seguro que sabedes que hai contrasinais con diferente nivel de seguridade. Por exemplo, debemos evitar aqueles que estén relacionados con un, tal é o caso dos apelidos ou o DNI. Tamén hai determinadas secuencias moi apetecibles do tipo 1234 ou password, como nos relata Jorge Gómez no seu blog. Estas resultan fáciles de lembrar... para todo o mundo e por iso son pouco aconsellables.

Debedes saber que a introducción de símbolos especiais nos vosos contrasinais incrementan a súa seguridade e o número de caracteres que empreguedes é outro factor determinante.

A aplicación Password.es que nos chega vía What's New serve para xerar contrasinais co nivel de seguridade que demande cada usuario.

Procurade cambiar os vosos passwords con certa frecuencia e se non se vos ocurre ningún, probade esta aplicación!

Onde está???

A aplicación PlaceSpotting é un xogo baseado en Google map na que cada usuario propón unha imaxe dun lugar real en calquera parte do mundo para ser localizado a partir dunha serie de pistas.

Teredes que movervos no mapa arrastrando e aplicando zoom ate dar co lugar preciso. Probade a solucionar algunha das propostas ou a crear unha nova. Cal é a da imaxe???